Pan-ArcticVision – finala á Blábar

Longd: 120 min

Nú verður tað! Nú skal avgerast, hvør vinnur Pan-ArcticVision, sum er nýggja altjóða tónleikakappingin fyri arktiska økið – ella ein Eurovison fyri Arktis.

Pan-ArcticVision kappingin verður stroymd beinleiðis úr Nuuk. 10 tónleikarar úr 10 ymiskum londum í arktiska økinum fara at kappast um at fáa flestar atkvøður og vinna kappingina. Tað verður sera spennandi at vita, hvussu fer at gangast hjá føroyska íkastinum til kappingina: Dansur á rósum, sum Ester Skála framførir. Ester hevur bæði skrivað orð og lag og sigur soleiðis:

“Lagið snýr seg um eina forelskaða gentu. Gentan følir, at hon livir í einari kaldari verð. Hóast summi fólk halda hana vera eitt sindur løgna, so sær hon vón og tað góða í lívinum. Gentan fer í einar ljósareyðar brillur og brádliga sær hon ein heim fullan av blómum og kærleika.”

Øll eru hjartaliga vælkomin til finalukvøldið á Blábar í Tórshavn, har vit saman fara at fylgja við kappingini. Finalan verður stroymd og vit sleppa at greiða okkara atkvøðu har.

Seinni um kvøldið verður avdúkað, hvussu atkvøðurnar eru býttar – eitt nú, hvør hevur fingið douze points!

Komið við! Tiltakið er ókeypis. 

Fylg við kappingini heima
Um tú ikki fært komið á Blábar, so ber til at stroyma Pan-ArcticVision heima. Far inn á panarcticvision.org ella á Facebook-síðuna. Eisini fært tú greitt atkvøðu gjøgnum hesar síðurnar. 

PanArcticVision
Pan-ArcticVision er ein altjóða tónleikakapping, sum hevur sín íblástur úr Eurovision. Tó, fyri føroyskar tónleikarar er ein ávísur munur; í Eurovision kunnu teir ikki kappast undir egnum flaggi, tað kunnu teir á Pan-ArcticVision. Hugsanin handan Pan-ArcticVision kappingina er at varpa ljós á tónleikamentanina kring Arktis, umframt á ymisku málini, eyðkennini og mentanirnar í økjunum.

Hetta er aðru ferð, at skipað verður fyri Pan-ArcticVision. Fyrsta Pan-ArcticVision kappingin varð hildin í fjør í Vadsø í Norðurnoregi.

Pan-ArcticVision er fyriskipað av NORDTING – The Northern Assembly, og er framleidd í samstarvi við Katuaq – Mentanarhúsið í Nuuk, og KNR – Kalaallit Nunaata Radioa (Grønlendska kringvarpið). Verkætlanin verður stuðlað av Norðurlendska Mentanarráðnum o.ø.