Oyggjadagur 2025
Aftur í ár verður vælumtókta tiltakið Oyggjadagur! Á hvørjum ári hava fólk møguleika at vitja oyggjarnar í Tórshavnar kommunu, har skipað verður fyri ymiskum túrum á degnum.
Hesuferð verða tað oyggjarnar Nólsoy og Koltur, ið eru á skrá.
Til Nólsoyar verður siglt við Westward Ho, har møguleiki verður at keypa atgongumerki til túrar við ferðaleiðara í hagan, bæði hjá vaksnum og børnum. Á barnatúrinum til Korndals, har prinsessutoftirnar eru, kemur ein ektaður sjórænari at siga frá!
Eisini verður skipað fyri forvitnisligum túrum til Kolturs, har siglt verður við Silju Star. Her ber til at keypa sær atgongumerki til fýra ymiskar túrar við ferðaleiðara, antin gjøgnum bygdarlagið við frásøgn, ella ein megnartúr niðan á oyggj, at njóta tað vakra útsýnið.
Túrarnir til Kolturs á Oyggjadegnum
Niðan á oyggj: Hetta er ein túrur fyri teg, ið ynskir at merkja náttúruna heilt inn á bein. Tú merkir veruliga, at tú livir, tá tú gongur upp eftir brøttum lendi, og kemur niðan á oyggj og sær tað ómetaliga vakra útsýnið.
Gjøgnum bygdarlagið: Gingið verður gjøgnum bygdarlagið, har sagt verður frá um oynna, búsetingina og fólkalívið í bóndasamfelagstíðini upp til okkara dagar. Møguleiki verður at vitja innar í savnshúsini Uppi í Búð, Heimið í Húsi ella bert at njóta tí vøkru náttúruna, áðrenn siglt verður heim aftur.
Les meira um túrin og keyp atgongumerki niðanfyri.
Túrarnir til Nólsoyar á Oyggjadegnum
Hendan dagin verður skipað fyri tveimum túrum, ein til børn og barnsligar sálir, og ein til vaksin.
Hendan dagin sleppa børnini á túr við einum sjórænara, ið kemur at siga teimum søguna um prinsessutoftirnar. Tey ganga til Korndals og til Uppi í Skipi.
Fyri tey vaksnu verður gingið til Suður í Dalar, har ein ferðaleiðari kemur at siga frá ymiskum á túrinum. Túrurin tekur uml. 3 tímar, og gingið verður hóvliga, men vit frámæla fólki, ið eru illa gongd at fara við á hesum túrinum.
Lokalir tónleikarar spæla harmonikutónleik á Ovasavninum. Vinuvaflur (uppskrift hjá Olevinu, mammu Ova😊) og kaffi verður til sølu á Ovasavninum.
torsinfo@torshavn.fo 
+298 30 24 25 
Facebook 
Instagram 
