Gongufelagið

Tú kanst tekna teg sum lim á netinum ella hjá Visit Tórshavn. Um tú samstundis biður Visit Tórshavn um upptøku á Facebook-síðuni fyri limir, fært tú eisini fráboðanir tann vegin, og har síggjast eisini myndir frá túrunum.

Øll, búsitandi í Føroyum kunnu gerast limir. Okkara túrar eru ikki fyri ferðafólk, men húski, ið eru limir, kunnu hava egnar gestir, t.d. summargestir, við á túrunum.

Árliga limagjaldið í Felagnum Tórshavn/Gongufelagnum er 320 kr. og tað er galdandi fyri alt títt húskið. Limagjaldið rindar fyri ymsar tænastur, sum Visit tòrshavn ger fyri Gongufelagið, eitt nú at senda lýsingarnar til limirnar, at røkja limalistan, at útvega leigubuss, taka ímóti tilmeldingum, tá tørvur er á tí o.m.a.

Túrarnir eru oftast ókeypis. Vit koyra sjálvi, skipa okkum í bilar og biðja fólk geva bilføraranum 50 kr. í hondina hvør fyri brennievni v.m. Í einstøkum førum kann vera neyðugt við leigubussi ella atgongukostnaði, og tá verður upplýst í lýsingini, hvat skal gjaldast fyri hetta og um neyðugt er við tilmeldingarlista.

Nei, einstakir túrar við áhugaverdum ella søguligum innihaldi verða eisini gjørdir í Havnini og úti um landið.

Nei, túrarnir eru oftast í vikuskiftinum, leygardag ella sunnudag, antin fyrrapart ella seinnapart, alt eftir veðrinum. Um summarið eru viðhvørt kvøldartúrar mitt i viku.

Dagfestingarnar verða ásettar so hvørt. Vit ganga alt árið, men túrarnir eru nakað færri í vetrarhálvuni. Í alt er talan um gott 40 túrar um árið.

Skráin verður lutvíst løgd eftir uppskotum frá limunum og lutvíst eftir ynskjum hjá gongufyriskiparunum. Roynt verður at blanda torleikastig og longd á túrunum, soleiðis at okkurt er fyri øll.

Skráin fyri 2026 sæst longri niðri á síðuni.

Eingir túrar verða avlýstir. Viðrar ikki, har vit ætlaðu okkum, ganga vit ein annan, kanska styttri, túr ístaðin.

Túrarnir eru ókeypis fyri børn undir 15 ár. Børn mugu fylgjast við foreldrunum/vaksnum. Fara vit við leigubussi, kann verða talan um ein minni kostnað fyri børn.