Upplivingar

Vert at uppliva í høvuðsstaðnum

Í 1000 ár hevur Havnin verið miðdepil Føroya. Higar komu høvdingar úr øðrum oyggjum saman at tingast. Og soleiðis er enn í dag. Tá ið fólk av bygd vitja sín høvuðsstað, knýta tey ikki einans bond við býin og býarbúgvarnar, men eisini við onnur bygdarfólk, ið hava ørindi í Havn.

Hví koma so nógv fólk til Havnar? Tí býurin liggur mitt í landinum? Ella tí her er so nógv virksemi? Sannlíkt tað seinna – tí í Havn verður tú altíð eina uppliving ríkari.

Vilt tú út at eta fínt? Matmentanin í Havn er veruliga farin at blóma seinastu árini, og nú hevur tú eina røð av fyrsta floks matstovum at velja í. Minst til at bíleggja borð í góðari tíð!

Kanska tú kundi hugsað tær at vitað, um onkur góð konsert er í vikuskiftinum? Tað er tað allarhelst – tað munnu vera fá vikuskifti í árinum, har ið einki er á kalendaranum hjá teimum ymisku spælistøðunum og barrunum í býnum.

Tær (m)inniligastu upplivingarnar fært tú ofta á savnsvitjanum. Lít aftur í tíð í Tjóðsavninum og síggj fornlutir so sum tiltiknu kirkjubøstólarnar – ella lít fram í tíð í Listasavninum og fyll teg við tí nýggjasta nýggja, sum føroysk list hevur at bjóða.

Ov nógv at velja í? Hvat tá – eingin segði, tú bara kundi velja eitt úr rúgvuni. Byrja seinnapartin við eini savnsvitjan, far harnæst út at eta og síðan ein túr í býin at lurta eftir tónleiki. Havnin stendur opin.