Fólkatónleikakonsert v/Kalas í Ovasavninum, Nólsoy

Tær eru:

• Døgg Jógvansdóttir úr Dímun (violin)
• Kristianna Skarpheðinsdóttir Joensen (akkordion)
• Bjørt Holm (sello)
• Sigrið F. Hansen (kontrabass)

Tær fóru allar at spæla tónleik í 2010. Hetta var í samband við tónleikaverkætlanina „Litir í Leiki“ í Kommunuskúlanum í Havn, og haðani fingu tær klassiska tónleikaheimin sum bakland. Tær hava allar hvør í sínum lagi verið virknar á høgum støði innan klassiska tónleikin, millum annað hava tær vunnið fleiri virðislønir í tónleikakappingum sum Stella Polaris og Crescendo kamartónleikakappingin, báðar í Føroyum, og Berlingske Klassiske Musikkonkurence í Danmark. Tær hava verið virknar í Tórshavnar Musikkskúla, har tær hava fingið holla undirvísing, tikið trý ára útbúgvingina „Musikkskúlamiðnám”, og í mong ár eisini spælt við í Føroya Symfoniorkestri.

Tó fekk fólkatónleikurin eisini hjartastreingir teirra at darra, tá tær í 2017 fóru til Finnlands á Nordic Folk Camp at spæla alskyns norðurlendskan fólkatónleik. Tað var eisini á hesi ferðini, at tær fyri fyrstu ferð spældu saman. Stutt eftir tær vóru komnar heimaftur, stovnaðu tær bólkin, Kalas. Síðani hava tær spælt konsertir heima í Føroyum. Tær hava millum annað spælt í Stóru Dímun, Suðuroynni, Vágum og í Havnini. Harafturat hava tær verið á fleiri fólkatónleikastevnum í Føroyum og eisini uttanfyri landoddarnar.

Í ár hava tær givið út fløguna „Minnisgripir”, fyri at líta aftur á tær mongu góðu løturnar, sum tær saman hava fingið gjøgnum tónleikin
Fólkatónleikarafelagið skipar fyri.

Økistónar hevur stuðlað.

Vís á Tímin.fo